مصر بعد الثورة

مصر بعد الثورة عملت زي اللي اتجوزت واحد صايع وهي عارفة وقالت بعد الجواز ربنا ها يهديه على ايدي - وبعد الجواز طلع ميتينها

انا درست في كلية كلها بنات - كنا 400 بنت وحداشر ولد - وازعم اني فاهم دماغ البنات كويس -
علشان كده عارف ان البنت اول حاجة بتفكر فيها في خطيبها او صاحبها انه يكون واحد منظر او مركز او الاتنين تعرف تتمنظر بيه على صاحباتها -
صدقوني البنت المصرية اهم حاجة عندها منظرها قدام صاحباتها مش مهم هي على وفاق مع صاحبها ولا فيه اشياء مشتركة المهم صاحباتها ما يشمتوش فيها

اهم حاجة ان البنت تبقى مسيطرة وعارفة في قعدات النميمة ها يقولوا عليها ايه وكده كده محدش ها يتكلم عليها كويس فلما يحسدوها احسن ما يشمتوا فيها

وشعب مصر زيه زي بنات مصر بالضبط بيهمه كلام الناس وشكله قدامهم قبل ما يهمه مصلحته هو شخصيا -

وده بيتضح من اختياراته للزعماء وشعبيتهم -

يعني مثلا الشعب المصري اعجب بجمال عبد الناصر علشان طويل وهيبة وحنجوري ومنظر مع انه خرب البلد وهزمنا في الحرب (وده راى البعض)

اما السادات فعلشان اسود واصلع وبشفاتير وبيتهته في الكلام فمكانش عاجب حد رغم انه رجع الارض اللي ضيعها عبد ناصر

المصريين بناتهم عنسوا بسبب موضوع منظرهم قدام الناس برضه : لازم شبكة كذا وقايمة وشقة ماعرفش ايه

والموضوع نسبي يعني يا ويلها يا سواد ليلها اللي اختها او بنت عمتها خدت واحد جابلها وسوالها لازم هي كمان ما تقلش عنها

احنا اصلا عملنا الثورة غيرة من تونس اللي عرفت تخلع ريسها فنفسنا وخلعنا مبارك احنا كمان
علشان ما يبقاش ايه تونس دي كمان اللي احسن مننا

طب تعالوا كده نبص لاختيارات مصر في اجوازها قصدي في رؤسائها :

عمرو موسى - شفيق - عمر سليمان - البرادعي - الخ - كلهم رجالة بايظين بس فيه ناس مخدوعة فيهم وفاكراهم مناظر

انا عارف ان كلامي النهارده مدي على حركه 7 نوفمبر بس اعتبروها تخاريف بس شغلوا مخكم برضه

طب احنا اختارنا عمرو موسى على ايه؟ قالك راجل دبلوماسي ملو هدومه وشعبولا غناله -

واخترنا شفيق علشان راجل ظابط وطيار وملو هدومه وعنده بلوفرات ترد الروح

واخترنا سليمان برضه علشان ظابط مخابرات وطويل وبشنب وله سمعة انه تعلب مكار

واخترنا .........رغم انه اصلع وشيك فى لبسه وبرستيج بقى اوعى وشك وها نتمنظر بيه عالعالم

وأخترنا مرتضى منصور عشان هايعمل مشروع سيديهات فى البلد وهانصدر سيدديهات على جميع بلدان العالم بما فيها تونس اللى هى أحسن من ...اقال أحسن منا قال
وبلاش نتكلم على حد تانى كفايه كدا

فببساطة مصر عاملة زي الولية الغيارة الكيادة اللي تحب المنظرة على اخواتها واللي كتر خطابها لحد ما بارت


عموما ما تاخدوش كلامى جد خدوها في الفاني يعني بس شغلوا مخكم

كفايه بقى تخاااااااااااااااااااااااااااااااااااااااااااااريف

فوقوا بقى

تسلم محمد

كلامك جميل يا محمد

بس انا بعترض ع بعض الشخصيات اللى ذكرتها ومع بعضها

هختار شفيق وسليمان

الناس دى الكل بيقول عليها فلول بأماره ايه هل سرقوا ، نهبوا ، قتلوا زى البقيه الجواب لا

كل ذنبهم انهم كانوا ماسكين مناصب عاليه ايام المخلوع يبقى ده ذنبهم الوحيد

للاسف دى اساءة لينا قوى اننا بناخد البعض بذنب الكل

لو حد ماسك عليهم شىء يقدموه ويتحاكموا غير كده يبقى نبطل كلام

لازم نختار صح والاهم اننا نختار ونحترم اختيار الاخرين

انما اللى بنشوفه ده صعب كل حد مترشح تانى يوم بنسمع عنه بلاوى وكل دى طبعا اشاعات

وكفايه ليتقال اننا بنتكلم عن المرشحين هههههههه

تسلم محمد

تشكرا بنوته على المرور
وانا بحترم رايك جدا
وفكرك
ولكن :
انا هاسال حضرتك سؤال :
حضرتك ذكرتى قبل كده انك كنت مصادقه واحده وسيبتيها لأن فيها حاجات لا تتماشى مع قيمك وتقاليدك ؟صح
فهؤلاء كانوا موجودين فى بيئه فاااااااسده
لماذا لم يتركوها

الم يكونوا يعلموا؟؟؟؟؟؟؟؟؟؟؟؟؟؟؟
وشكرا على الرد



وتسلم تاااايجر على المرور