موضوعنا انهارده موضوع مهم
لكل بيت و مفيش ام معانيتش منه او هتعانى منه
ربنا يعافى كل اطفالنا يا رب
الموضوع هو
الاسهال و النزلات المعويه عند الاطفال
اول حاجه عايزة اقولها؟
يعنى ايه اسهال؟
هقولك الاسهال يعنى حاجتين كميه اكبر من البراز و عدد مرات اكتر
بس بشرط البراز ده يبقى سايل
بس خللى بالك كل واحد و عادته
يعنى لو طفلك اصلا عادته انه يعمل 7 مرات مثلا فى اليوم يبقى دا مش اسهال
لكن لو طفل عادته يعمل مرة واحده و لاقيتيه عمل 4 او 5 مرات هنا بقى تقلقى
فى حاجه تانيه ان الاطفال فى الشهور الاولى بيكون البراز بتاعهم سايل و
لونه اصفر او مايل للخضار شويه و ممكن توصل عدد المرات ل 7 مرات
او بعد كل رضعه دا للى بيرضع طبيعى
اللى بيرضع صناعى غالبا بيبقى البراز ماسك نفسه شويه و و عدد المرات اقل و ليه ريحه
طيب يجى دلوقتى دور سؤال مهم؟
هل كل اسهال يبقى نزله معويه؟
لا طبعا
فى اسباب كتيرة جدا للاسهال منها
مثلا انه لو بيرضع بس يكون عنده حاجه اسمها lactose intolerance
و فى الحاله دى يبقى علاجه انه ياخد لبن صناعى خالى من اللاكتوز بس بعد منتاكد ان اللبن هو السبب بس دى حالات نادرة شويه
او لو بياكل يكون اكل معين بيعمله الاسهال ده
او انه بياخد دوا من اعراضه الجانبيه الاسهال
او ممكن يكون بسبب عدوى تانيه مش فى الجهاز الهضمى زى عدوى الجهاز التنفسى او البولى
كويس؟
بس من اكتر الاسباب المسببه للاسهال النزلات المعويه
ممكن تكون بكتيريه او فيروسيه او طفيليه
طيب دلوقتى اعمل ايه لو ابنى عنده اسهال؟
احب اقولك ان الاسهال حاجه متخوفش خالص بالعكس دا بيطهر بطن ابنك
بياخد وقته و بيروح
اهم حاجه اهم حاجه انى اعوض السوايل اللى بيفقدها
لاز م يا جاعه تعوضوا السوايل بعد كل مرة اسهال
طب اعوضها ازاى؟
بمحلول معالجه الجفاف عارفاه؟
ايوة هو بتاع ماما كريمه ده
مهم جدا يا جماعه لانه بيعوض نقص السوايل اللى بيفقدها طفلك
بعد كل مرة اسهال تديه الباكيت على 200 سم ميه مغليه و مبرده
و تتاخد على مدار ساعه كل 5 دقايق تدى معلقه عشان ميرجعوش
ماشى؟
و كترى من السوايل سكر خفيف و لو بيرضع كترى الرضاعه
و فى بعض الاكلات اللى بتساعد على ان البراز يبقى ماسك نفسه
زى:
الجزر و الرز و الموز و البطاطس
طيب امتى اروح لدكتور؟
1:لو ظهرت اعراض جفاف
اللى هيا ايه؟
هتبصى فى عنيه تلاقيها داخله لجوة
و لسانه هيبقى ناشف
و هتقل كل افرازات الجسم زى العرقو الدموع و البول (لو لاقيتيه مش بيبل البامبرز ع الاقل مرة كل 8 ساعات)
و لو شديتى جلد بطنه هتلاقيها بترجع لمكانها تانى بطء
هتلاقى الفتحه اللى فى راسه نازله لتحت شويه
2: لو طفلك كان بيرجع كل حاجه و مفيش حاجه بتستنى فى بطنه
3: لو درجه حرارته زادت دا غالبا بتكون اشارة لان العدوى اللى خدها بكتيريه
و هيحتاج مضاد حيوى لكن لو مفيش حرارة بتكون غالبا العدوى فيروسيه و بيكون مش محتاج مضاد حيوى
بس طبعا اغلب الدكاترة بيستسهلو و يدو مضاد حيوى على طول مع ان 80% من الحالات بكون سببها الروتا فيروس
4: لو لقيتى دم او مخاط فى البراز
و اخر حاجه عايزة اقولها ان طبعا بعد كل مرة اسهال تغيريله الحفاض عشان مش يعمله التهابات
