بنوتة مصرية
نائبة المدير
 | | موضوع: ملف كامل عن جرد وترتيب المطبخ وتنظيفه بالصور الأربعاء 18 أبريل - 21:49 | |
| المطبخ
هو أكتر حاجة بتتبهدل في البيت وفي نفس الوقت اكتر حاجة بتقضي فيها وقت
واكتر حاجة بتاخد منك مجهود وبتعمل عليكي ضغط لو مش مترتبة ومتنضفة
علشان كده لازم تاخدي بالك منه وتحسنيه علشان تحسني نفسيتك وتخرجي منه
سعيدة ومبسوطة وبالتالي تنشري سعادتك في بيتك, وده مش هيحصل إلا لو كان
مرتب ونضيف طول اليوم ويفتح النفس
ازاي تحافظي على مطبخك كانه اوضة عادية طول اليوم مفيهوش روايح غير مرغوب فيها ولا كركبة ويبقى مستعد لاستقبال الضيوف ؟
دي 4 مراحل تخليكي ترتبي مطبخك من اول وجديد وتعرفي ازاى تحافظي عليه
وبعدها مش هتحتاجي تاني تعملي حملة عليه علشان تروقيه من اوله لاخره لانه
ببساطة هيبقى على طول متروق ونضيف
الاربع مراحل دول هما:
الجرد – التنظيم – التنظيف – التزيين
وهنعرضهم واحدة واحدة:يتبع |
|
بنوتة مصرية
نائبة المدير
| | موضوع: رد: ملف كامل عن جرد وترتيب المطبخ وتنظيفه بالصور الأربعاء 18 أبريل - 21:54 | |
| ودي أهم مرحلة
المرحلة الأولى : الجرد
أول حاجة لازم تعرفيها هي (أنا عندي ايه في المطبخ)؟
فايدتها:
كتير اوى بيبقى المطبخ مليان على اخره حاجات ونكتشف في الاخر اننا مش
بنستعملها وواخدة مكان على الفاضي ومخلياكي تطلعي الحاجات الي بتستعمليها
برا على الرخامة علشان كده الدنيا بتتكركب معاكي , لان في حاجات ملهاش لزمة
واخدة المساحة في الدرف
طيب نحلها ازاى؟
انا هريحك واقولك المحتويات اللي المفروض تبقى موجودة في المطبخ :
1- أدوات الطهي:
أواني الطبخ (الومنيوم او استانليس او تيفال او صاج) : يعني كل ما هو بيتطبخ فيه ^_^ , وكذلك البراريد والكنك
اختاري اللي بتستعمليه بس وحطيه بلاش العرض اللي بنعمله في الدرف علشان
الضيوف لما ييجوا ^_^, وشيلي الزيادة عليكي في كراتين نضيفة تحت اي سرير
لحين ما تحتاجيها, ولو انتي عروسة ولسه بتجهزي نصيحتي ليكي متشتريش غير على
اد استعمالك بسسس كلام الناس مش هينفعك لما تلاقي بيتك مزحوم!)
2- أواني التقديم:
هي الاطباق والملاعق والشوك والسكاكين وطقم التوزيع والصواني اللي بتطلعي
عليها الحاجة, ونصيحة لو حتى عندك 50 طقم للاكل خلي بس طقم او اتنين في
المطبخ تنوعي ما بينهم في التقديم والباقي حطيه في البوفيه علشان الزحمة ,
وكل ما تحبي تنوعي شيلي طقم وهاتي واحد تاني مكانه
من فوايد الطريقة دي كمان انك مش بتلاقي ادامك اطباق كتيرة فكل ما تعملي
اكلة تعرفي في طبق جديد وتطنشي اللي في الحوض من كتر اطباقك ^_^ وطبعا
يتكوم عليكي مواعين بالهبل
3- أواني الشرب:
وأنصحك تخلي بس في المطبخ :
طقم كبايات وشفشق عصير
طقم كبايات شاي
مجات للشاي والنسكافيه على حسب عدد الموجودين في البيت (يعني لو انتو 2 اخرك اخرك تطلعي 4 مجات والباقي على البوفيه عدل ^_^)
كباية للماء
4- منتجات مستعملة في الطهي:
وهي كل الحاجات اللي بتستعمليها وانتي بتطبخي ومبتتشالش في التلاجة زي: سمنة – زيت – خل
5- الأجهزة:
الخلاط والكبة والمضرب والغلاية وقطاعة الخضار وخلافه
6- الفوارغ:
ودي ايااااكي ثم اياكي يبقى عندك فوارغ كتيرة مبتعمليش بيها حاجة وسيباها ,
شيلي لنفسك من كل نوع على اد استعمالك فقطططط والباقي على الزبالة عدل ,
يعني مثلا 3 برطمانات وسط – 2 كبيرة – 2 صغيرة , ومتزوديشش عن استعمالك
وبلاش كلمة (خليه يمكن ينفع)
7- الخزين:
هو كل الأكل اللي بتشيليه مخزَّن في المطبخ وبردو مش بيتشال في التلاجة وهو انواع :
1- خزين الخضار :
زي البطاطس والبصل
2- الخزين الخاص بالطبخ:
الأرز – السكر – المكرونة – الشعرية – الحبوب بانواعها (فول – عدس – قمح
بليلة – الخ ^_^) وكمان المعلبات زي الصلصات – الطحينة – زيت الزيتون ,
وهكذا
3- خزين الحلويات:
تمر – عصاير – كيك – علب جيلي او ايس كريم , وهكذا
4- خزين المشروبات :
شاي – نسكافيه – علب اعشاب (ايزيس او غيره, أو بدالها برطمانات للاعشاب السايبة) – علب لبن
5- خزين التوابل:
جميع انواع التوابل اللي بتحتاجيها سواء كانت في برطمانات او اكياس
8- أدوات النظافة:
اسفنجة الأطباق
اسفنجة الجلي للحلل وما شابه, نصيحة دي انضف مليون مرة من السلك وبتنضف زيه
واكتر كمان بس بتتميز بانها بتعيــــــــش ومبتطلعش ريحة سيئة زي السلك
جوانتي سكوتش برايت او اريكس مطاطي , بيعيش معاكي كتييييييير ومبيتقطعش الا بعد حوالي سنة او اكتر وممكن تعملي بيه كل شغل البيت
اسفنجة الكبايات , ومتستغربيش ان لكل حاجة حاجة , علشان خاطر تفضل نضيفة والروايح متبقاش مختلطة بطريقة تقرف ^_^
اسفنجة تنظيف مسطحات المطبخ (الرخامة – الدرف من برا – باب التلاجة) , ودي ممكن اي نوع من اللي فوق وانا افضل اللي زي بتاعت الاطباق
سائل تنظيف الصحون
صابون لايديكي
ولو عندك مكان في المطبخ ورا الباب او جنب التلاجة حته مستخبية كده ممكن
تحطي بقية ادوات النظافة بتاعت البيت : الفرشاة – الجاروف – المقشة –
الزعافة – المنفضة
9- الأكياس البلاستيك:
طبعا احنا المصريات منقدرش نعيش من غير رزمـــــة أكياس متسالينيش بنعمل
بيها ايه ^_^ , علشان كده انصحك بطريقة حلوة للجرد والتصنيف :
الاكياس على نوع من 3:
1- نوع للمهملات:
أنصحك تستمعلي اللي بتشتري فيه البقالة (بتاع السوبر ماركت) او بتاع فتح
الله وكارفور وكده , منها توفير ومنها انك تستعملي اللي عندك , ومنها ان
أحجامهم صغيرة فتخليكي ترمي الكيس اول باول وميتكونش في مطبخ اي روايح غير
مرغوب فيها
2- نوع لتعبئة الاغراض في الفريزر أو لرمي الزيت في المهملات بعد استعماله
(يتحط في كيس صغير وتربط عليه كويس اوى وترميه في المهملات بدل ما تدلقيه
في الحوض ويسده), والنوع ده اللي بيكون حجمه صغير وطبعا مش مخروم ^_^
3- أكياس تنفع للخروج الي هي بتاعت محلات الهدوم والكلام ده , ودي خليها برا المطبخ خالص في درج مثلا في النيش او اى درج فاضي عندك
دلواتي تطلعي زي الشاطرة كده كــــــــل الاكياس الي عندك وتصنفيها لواحد
من التلاتة دول , واهم حاجة يكون كيس كويس ومش مقطوع , الي يناسب المهملات
تحطيه في كيس منهم والي يناسب النوع التاني تحطيه في كيس وسط علشان يقضيهم ,
والتالت على برا , واللي ملوش لزمة يترمــــــــــــي على طول , وتاخدي
الكيسين اللي هينتجوا ليكي من الموضوع ده (هيبقى واحد لاكياس المهملات
والتاني للاكياس الصغيرة) وتخليهم على جنب لحد ما تلاقيلهم مكان حلو في
درفة محندقة كده في المطبخ ^_^
10- فوط المطبخ :
ومـــــا أدراك ما فوط المطبخ ....
بصي يبقى عندك 3 أنواع فقط في المطبخ لا غير , وعايزة تعرفي ست البيت دي
نضيفة وللا لا بصي على فوطة مطبخها واحكمي ^_^ , الانواع دي هي:
1- نوع تنشفي فيه ايديكي وهي نضيفة , يعني مثلا دخلتي غسلتي كباية وبعدين
غسلتي ايدك بالصابونة تنشفي فيها (مينفعش تنشفي في الفوطة الي بتمسحي بيها
الرخامة او بتمسكي بيها الحلل ^_^)
2- نوع تنشفي فيه ايديكي وهي ريحتها طبيخ ^_^ ,بمعني انك مثلا بتقشري توم
في وسط الطبخ , طبعا مش لازم كل حاجة تمسكيها بعده يبقى ريحتها توم علشان
كده تروحي تغسلي ايدك (انشالله بالميا^_^) وتنشفيها في الفوطة دي (يعني هي
فوطة مخصصة للروائح المطبخية)
والنوعين دول الي بيبقى شكلهم زي كده
3- نوع بتمسكي بيه الحلل ولو اني انصح بالحاجات اللي بتتشري للغرض ده مخصوص
(بتبقى زي سفنج كده مغلف بقماش) ودول تحطيهم لوحدهم على جنب متلمسيهمش غير
لمسك الحلل والحاجات السخنة^_^
وطبعا الفوط دي بتحطيها في الغسالة مع الهدوم اللي بتتغسل على حرارة عالية
علشان تنضف وتبقى ريحتها حلوة وتشيليها بردو في المطبخ في مكان معين.
متهيألي كده منستش حاجة من مكونات المطبخ وقسمناها لأقسام , دلواتي بعد الجرد أي حاجة ملهاش قسم تترمي برا ^_^
كده خلصنا أهم مرحلة ,
يتبع يا حلوين
عدل سابقا من قبل بنوتة مصرية في الأربعاء 18 أبريل - 22:22 عدل 1 مرات |
|
بنوتة مصرية
نائبة المدير
| | موضوع: رد: ملف كامل عن جرد وترتيب المطبخ وتنظيفه بالصور الأربعاء 18 أبريل - 21:57 | |
| المرحلة التانية : التنظيم :
تاني مفتاح من مفاتيح المطبخ السوبر انك تعملي على رأي الاجانب (بيت لكل شئ) , بمعنى إنك تكوني محددة مكان لكل فتفوتة فيه
فايدتها: لما الدنيا
تتبعتر منك وتحبي تروقيها في ثواني تدخلي كل حاجة البيت بتاعها متلاقيش
ادامك اي كركوبة ^_^ (لما حماتي بتطب عليا 5 دقايق بيكون مطبخي اوه لا لا
^__^)
ودي بعض الأفكار:
1- الرخامة يجب أن تكون فاضية
تمــــــــاما بالذات لو مطبخك ضيق , ده بيديكي مساحة تشتغلي فيه براحتك
وتبقى نفسك مفتوحة وفي نفس الوقت بيخلي شكله مرتب ومريح للعين وكمان بيديكي
فرصة لتجميله بديكورات حلوة لو حبيتي
2- قسمي الدرف اللي عندك : بحيث
تخلي كل قسم من الاقسام الي اتفقنا عليها مع بعضه ولوحده لو المكان يساع ,
لو المطبخ ضيق ممكن تحطي قسمين جنب بعض مع الفصل بينهم
أمثلة:
1- الدرف اللي تحت :
- حطي فيها اواني الطهي وأواني التقديم والمنتجات المستعملة في الطهي وخزين الطبخ وخزين الخضار
- الاكياس البلاستيك ونصيحة ممكن تخليهم في درفة لوحدهم مع خزين الخضار
2- الادراج ممكن تحطي فيها الشوك والسكاكين والملاعق وصواني التقديم
3- الدرف اللي فوق:
- للتوابل والمشروبات وانصحك خلي كل واحدة في درفة او ابعديهم عن بعض علشان مياخدوش من ريحة بعض
- خزين المشروبات وخزين الحلويات
- الكبايات
- أدوات النظافة (زي مساكات الحلل ولو مخصصة مفرش للاكل ومريلة المطبخ)
- الاجهزة , وكلها خليها في رف مع بعض ويكون سهل الوصول اليه
4- المطبقية ^_^
أيوه المطبقية مستغربين ليه !! ... بحط عليها الفوط اللي بنشف فيها ايديا
علشان معلقهاش بشكل مش لطيف على مقابض الدرف ^_^ , منها انها بتتهوى وتنشف
ومنها انها مبتبقاش ادامي (لان المطبقية عندي مقفول عليها في درفة ^_^ ,
ولو انتي مطبقيتك مكشوفة عادي بردو ممكن تحطيهم بس بطريقة شكلها شيك على
جنب كده ومطويين كذا حتة , طبعا متحطيهمش باهمال على المطبقية ايا كانت
مكشوفة او لا , وخلي ليهم مكان محدد وراعي ان المطبقية تكون دايما فاضية
على اد ما تقدري , واي حاجة مبلولة تنشفيها على المطبقية واول ما تنشف على
مكانها عــــــــــدل ^_^
الحاجات اللي ممكن تتساب على الرخامة :
المايكروويف (مش هنلاقيله حته نوديه فيها طبعا ^_^, وتبقي شاطرة لو عرفتي تخفيه ^_^ )
زجاجات ماء الشرب (لو ملهاش مكان في الدرف) , وزجاجات الماء الي بتتخزن
خوفا من قطع الماء بردو شيليها في الدرف(نيميهم علشان ميخدوش مكان)
حامل المناديل , لو معندكيش حامل شيلي المناديل في اى درفة
طقم الغرف لو ليه حامل
حامل المجات (من باب الشياكة مش أكتر ^_^)
كده خلصنا الخطوة التانية, فاضل اخر خطوتين ودول سهلين خالص, التقيل عدا (كان في المرحلة الاولى^_^)
يتبع
عدل سابقا من قبل بنوتة مصرية في الأربعاء 18 أبريل - 22:18 عدل 1 مرات |
|
بنوتة مصرية
نائبة المدير
| | موضوع: رد: ملف كامل عن جرد وترتيب المطبخ وتنظيفه بالصور الأربعاء 18 أبريل - 22:00 | |
| المرحلة الثالثة: التنظيف:
فايدتها: دي المرحلة
الي هتخليكي تحافظي على نظافة وترتيب مطبخك وكانه لسه معمول كل يوم لو
اتبعتيها ومكسلتيش, وافتكري دايما إن التنضيف بيكون أسهل اول ما الحاجة
تتوسخ مش لما تتركن
وهنقسمها لانواع على اساس تكرار العمل :
1- عمل يكرر كل اعداد وجبة
1) تشوفي ايه على المطبقية نشف وترجعيه مكانه علشان تفضي مكان لغيره على المطبقية ومتحسيش انها مكركبة ومتشجعش على الغسيل ^_^
2) غسل كل اللي استعملتيه في اعداد الوجبة من أواني طهي (يعني تغسلي كل الي
استعملتيه قبل ما تخرجي من المطبخ وتقدمي الوجبة) وبعدين كل الي استعملتيه
في تقديم الوجبة وتفريغ الاواني, من اواني طهي واواني تقديم (بعد ما
قدمتيها والاطباق والحلل اللي فضيت)
3) ارجاعك كل الي استعملتيه مكانه قبل مغادرة المطبخ (مثلا الخلاط , القطاعة)
2- عمل يكرر كل يوم:
1) ده هيتضمن مسحك لكل مسطحات المطبخ (الرخامة وباب التلاجة واسطح الدرف) ولو كسلتي ممكن تعملي الرخامة بس
2) تنظيف البوتاجاز بعد الانتهاء من طبخ وجبة الغداء (ممكن باسفنجة الجلي وسائل تنظيف الصحون)
3) كنس الأرض أو تطويقها على حسب ما تحبي
3- عمل يكرر مرة في الاسبوع:
1) تنظيف التلاجة من الداخل
2) مسح الأرض
3) تنظيف الفرن
4- عمل يكرر مرة كل شهر :
غسل الشفاط وسيراميك الحوائط
بكده ده جدول تنظيف سهل جدا ومريح ولو اتبعتيه ممكن تقفي شوية وقت زيادة في
المطبخ بس قصاد كده مش هتلاقي فيه فتفوتة مش على هواكي ومش هتتحرجي لما حد
يطب عليكي زي مثلا حماتك ^_^
هنزل المرحلة الأخيرة حالا ودي عموما تعتمد على أذواقكو اكتر من اي حاجة تانية
يتبع
عدل سابقا من قبل بنوتة مصرية في الأربعاء 18 أبريل - 22:16 عدل 1 مرات |
|
بنوتة مصرية
نائبة المدير
| | موضوع: رد: ملف كامل عن جرد وترتيب المطبخ وتنظيفه بالصور الأربعاء 18 أبريل - 22:05 | |
| المرحلة الرابعة والأخيرة : مرحلة التزيين: فايدتها: الجمال بيفتح النفس على الحياة وبيحسسك مهما كان شكل بيتك انك مهندمة وراقية وبيخليكي عايزة تحافظي على المستوى الي وصلتيله من النضافة ومستحيل تتراجعي عنه تاني, والحاجات اللي ممكن نشملها بتجميلنا هي: 1- الرخامة : دلوأتي عندك الرخامة تعتبر فاضية معليهاش حاجة, تقدري تحطي في وسطها فروتة فيها فاكهة أو شمعدان صغير أو زهرية فيها ورد صناعي أو آنية فخارية شيك أو أي فكرة تانية تجيلك بس المهم تكون بسيطة ورقيقة ومتعملش كركبة وتتلاءم مع الحاجات الي انتي سيباها على الرخامة   لاحظي البساطة وتناسق الألوان في الصور , ممكن تحطي زهرية زينة او ورد متناسق مع الوان برطمانات بتستعمليها زي الصورة  طبق بني فيه زينة صفرا بلون فاتح ينطق اللي حواليه 2- الأرض : مشايات شيك صغيرة أهم حاجة متكونش تقيلة علشان تعرفي تنضفيها كل ما تتبهدل وياريت لو غامقة علشان ميبنش فيها البقع  مشاية يلون الدرف  مشايتين بلونين متكاملين وماشيين مع لون الدرف (الفتح مع الغامق بيعمل تضاد حلو يلفت النظر) 3- الحوائط : -ممكن تزينيها بفروع فواكه ملزوقة بطريقة متموجة - أو بلوح عليها فواكه او خضار - او باستيكرات من اللي عليها رسوم فواكه او على حسب ما تحبي, وتكلفتها مش عالية -ممكن لو عندك شباك بيدخل نور حلو تحطي عليه ستارة خفيفة شفافة بلون خفيف قريب للون المطبخ او يكون متكامل معاه طبعا لو عندك افكار جمالية تانية انتي وذوقك بقى , بس دي كانت الخطوط العريضة اللي ممكن تتبعيها في تنظيمك لمطبخك علشان تحبيه ويحبك وتبقي فخورة بيه طول الوقت ياريت يكون الموضوع مفيد ويعجبكم السلام عليكم يا حلوات |
|
ام عمر وملك 82
المشرفات
| | موضوع: رد: ملف كامل عن جرد وترتيب المطبخ وتنظيفه بالصور الثلاثاء 1 مايو - 3:10 | |
| موضوع أكتر من رائع وكلة استفادة وانا بجد مستغربة ان مفيش ولا رد واحد عليه لانك تستاهلى تحية وتقدير على الموضوع بجد تسلم ايدك واختياراتك |
|
بنوتة مصرية
نائبة المدير
| | موضوع: رد: ملف كامل عن جرد وترتيب المطبخ وتنظيفه بالصور الثلاثاء 1 مايو - 23:51 | |
| منحرمش منك أم عمر شكرا جزيلا حبيبتى على المرور واتمنى تكونى استفدتى منه نورتى |
|
