يوميات عانس حقووووود

لو تخيلنا حياتنا بلغة الكمبيتر هنلاقى ان و احنا بنستتب بندوس على اوكى فى حاجات كتيرة اوى و احنا مش واخدين بالنا
انا النهاردة هتسائل فى شوية من الحاجات الغامضة بالنسبة لى


1 - ليه الست فى شهر العسل دايما بتأكل جوزها؟ هو البعيد اتسخط و لا هى مالهاش نفس؟

2 - ليه بقى بعد شهر العسل بتودعه على باب الشقة و هو رايح الشغل بعيون ماليانة حب و يقوم هو حادفها بوسة و هى ليسة بالبيجاما؟ هى مش رايحة شغلها هى كمان؟

3 - طب هى لو مش بتشتغل .. ايه اللى مصحيها بدرى بقى؟؟ اياك حد يقوللى عشان تفطره .. هقل ادبى !!!

4 - "سؤالى المفضل" ليه الستات لازم ترجع قبل اجوازها؟؟ تانى و تالت و رابع ... ليه؟؟ ليييييييييييه؟؟ لييييييييييييييييه؟؟؟؟؟ طب تخيلوا معايا كده... الراجل خلص شغل... رجع البيت..حط المفتاح فى الباب (ماحنا من فترة طالبنا المجتمع انه يعمل نسخ من مفاتيح الشقة للرجالة) و دخل الشقة مالقاش مراته.. هه بقى؟ و بعدين؟؟ ايه بقى الكارثة اللى هتحصل؟؟

5 - ده سؤال و ممكن يكون رد على 4
ليه الست اول ما جوزها يرجع من الشغل ( وهى زوجة مثالية و موجودة فى البيت) تجرى وراه الأودة و تقف وراه و هو بيقلع الجاكيتة؟ طب هو قبل الجواز كان بيلبس ايه فى الشغل؟ ثم ان فى اغلب الاحيان الست اقصر من جوزها .. يعنى فى الواقع هى مش بتساعده نهائى .. هى بتقف وراه فاردة دراعتها و هو يحدف الجاكيتة لورا و هى تلقفها

6 - ليه اما الست بتحب تدلع الراجل بتلبسه الكرافتة؟ طب هو قبل الجواز كان بيعمل ايه؟ ماتقولوش مش كل الناس بتعرف تظبطها .. حتى لو بيعرف...الغريب فى الموضوع ان فى اغلب الاحيان هى بتلبسها.. اصل فعلا ظبطة الكرافتة دى اسهل و الواحد لابسها .. هى تلبسها و تربطها و بعديت تفكفكها سنة و تديهاله

7 - لودى حاجة لزوم الدلع؟؟ ليه بقى مفيش راجل بيظبط لمراته الطرحة و هى نازلة؟ سواء سبانيش او عادى ( على فكرة هى مجرد تخيلها مستفز ...ههههههه) و لو مش محجبة , ليه مايسرحلهاش شعرها قبل ما تنزل .. يفك الرولون و يطلع السيشوار و يظبط القصة او يلمه بتوكة ...كده يعنى

8 - ليه الفطار فى السرير دلع؟
طب و اما نفتفت و النمل يهجم على السرير و يقرص فينا؟
طب و العماص؟ مش نغسل وشنا و سناننا الاول بعدين ناكل؟
طب و اما نبقع المفرش ولا اللحاف و الست ترقع بالصوت يرجع يقول عليها مش رومانسية؟

9 - ليه الرجالة لازم تتنحنح و هى خارجة من الحمام؟ ايه علاقة اللى عملوه فى الحمام بان فى حاجة فى زورهم و غالبا مفيش حاجة .. هو كده , الخارج من باب الحمام يتنحنح ..اوكى

10 - ليه الستات اما يبقوا فى مشكلة بيغمن عليهم؟
خطيبها يزعقلها .. تقع فى الحمام
باباها يرفض الجوازة ... تترمى فى الكنبة
جوزها يقولها مش بحبك ..تندلق فى السرير
لأ و ايه؟ هى غالبا بتبقى زابطة حسابات المكان و الابعاد فى مخها قبلها .. يعنى لو فى ترابيزة وراها استحالة تتخبط فيها والا رقبتها هتنكسر و نرتاح كلنا .. و لو جنب السرير تلاقيها اتسنترت فيه كده و مالياه و طبعا فى الحمام عند البايون .. لا يمكن حتى تتخبط فيه!!!




و فى الاخر يتبقى الألغاز اللى لا جيلنا و لا جيل احفادنا هايحلوهم
- الست بتعمل ايه اما بتحضر الحمام
- و الميا السخنة لازمتها ايه فى الولادة الطبيعبة *
- و ميل جيبسون اما باس صوفى مارسو فى الوداع فى فيلم القلب الشجاع و بعدين تف الدوا... عملها ازاى الحركة الصايعة دى؟؟




* زمان كنت فاكراهم بيسلقوا العيل .. اقصد يعنى الحموم لزوم النضافة بس اصل المية بتبقى بتبقلل .. دى اكيد مية سليق.
و اما دخلت طب قلت بس .. اكيد بيغلوا الادوات فيها.. بس طب الداية بتمسكهم ازاى؟ ماهم مولعين.. بتمسكهم بفوطة او حتة من المطبخ .. حاجة كده لزوم التعقيم


و النبى بطلوا تدوسوا اوكى و خلاص و اقروا بتدوسوا على ايه و اعرفوا لازمته ايه

و مش هابطل احقد


أهم شيء أن لا تتوقف عن التساؤل ..... ألبرت أينشتاين