كل من يسب و يلعن في المتظاهرين اللي في التحرير .. لو سمحت أقرأ ده ضرور

عضو هام

الكلمتين دول واقفين فى زورى من زمان وعايز اقولهم ( copied )

* الاستفتاء .............. اتزور
...
* قانون الغدر ....... اتغير

* قانون منع التظاهر .... افتكسوه

* قانون المحاكمة العسكرية ...... اخترعوه

* حكم رفع اسم المخلوع ... اتلغى

* قضية قطع الاتصالات .... اتلغت

* تسجيلات القتل العمد للثوار و المكالمات ... اتمسحت

* فارغ طلقات الرصاص ... اختفت

* فلول النظام واعوان مبارك .... فى كل مكان

* الاعلام المصرى ........ فاسد اخر حاجة

* مستندات ثروة المخلوع .... اختفت

* اهالي الشهداء ... بيتهددوا وبيتصفوا

* قانون الطوارئ ...... متلغاش

* اعضاء الحزب الوطنى ...... برضه ماسكين كل اجهزة الدولة

* امن الدولة ........ لسه شغال

* الشرطة ........ مش موجوده غير علشان المتظاهرين

* البلطجية ........... فى كل مكان

* الاسعار .................... بقت نار

* خطط الحكومة .............. غير موجودة

* قانون الانتخابات ............ زى الزفت

* قرار فصل اعضاء الحزب الوطنى من اجهزة الدولة ... هاهاهاها .... فى الثلاجة

* الشعب ... بيسقف و يزغرط بفض الميادين علشان خاطر عجلة الانتاج
حوش ياجدع الطيارات والصواريخ والدبابات اللى بنصنعها بقالنا 30 سنة
وبسبب التظاهرات المشئومة حال البلد وقف...

* المستندات اللي الشعب قدر يحصل عليها ...
اتسلمت للمجلس و النائب العام علشان يكملوا حرقها و فرمها
بس غصب عنهم والله ده بسبب ماس كهربائى

* الميدان اللي حيلتنا ... احتلوه وسيطرت عليه قوات حفظ الصينية !!

* شعارهم الجديد ... الجيش والشرطة ايد واحدة.... طب ضد مين ؟؟؟؟

* صوتنا ... بيكتموه

* حقوقنا ...... اللي كانت ضائعة ... ضاعت اكتر واكتر

* الثوار ............. محاكمات عسكريه

* الجيش ........... نزل ضد شعبه

* المشير وعنان وسليمان ... مبارك والعادلى لم يأمروا بقتل المتظاهرين
طيب حد يقوللى بقى انتو حميتوا الثورة من مين ؟؟؟
ولا المتظاهرين دول ماتوا نتيجة لأن صلاحيتهم كبشر انتهت ؟

* الانتخابات ... مسؤولها نفس المسؤول بتاع 2005 و 2010

* انابيب البوتجاز ..... وصلت 40 جنيه والناس بتموت مش لاقياها اساساً
فى الوقت اللى الغاز المصرى واصل كل بيت ف اسرائيل والاردن

* البنزين ...... يكاد يكون اختفى تماما بالرغم من ان انتج شركات البترول فى مصر
يغطى احتياجات 94 % من الشعب المصرى ؟؟؟؟

* المجلس العسكرى هيسلم البلد ابريل 2012 ؟؟
يعنى بعد 14 شهر من الثورة اللى اعلن فيها انه هيسلم البلد بعد 6 شهور ؟؟
واذا صدق اساسا فى كلامه ... هل هيسلمنا مصر اللى استلمها يوم 11 فبراير ؟؟
مصر اللى كل الناس كانت خايفة على بعضها ؟؟
مصر اللى الناس كانت بتكنس وتمسح الشوارع وتنضفها ؟؟
مصر اللى كان كل مصرى يومها بيقول بعلو صوته أنا مصرى وافتخر ؟؟؟
مصر اللى شعبها طيب وصدقكو ووثق فيكو وحط فى رقبتكم دم الشهداء ؟؟
مصر اللى ما كانش فى يومها مسلم ولا مسيحى ... حتى اسألو النقيب ماجد بولس
مصر اللى اتكتب على اهلها يدوقوا المرار ليل ونهار علشان تكرهوهم فى الثورة ؟؟؟

فنى المنتدى

تسلمى دمياطيه على الموضوع
أنا لا بلعن فى المتظاهرين اللى فى الميدان و أنا لا معاهم ولا ضدهم
وكذلك لا مع المجلس العسكرى ولا ضده
بس لازم الشعب ياخد باله من نقطه معينه وهامه جدا
أن جميع المؤسسات الدوله سقطت وانقب الشعب عليها ولم يبقى لدينا مؤسسه منظمه قويه الا الجيش
فلو انقلبنا ضده واسقتناه فلم يعد لدينا أمل فى بناء دوله مدنيه قويه

لا زم نلتزم الصمت حتى يتم ترتيب الامور الداخليه للدوله

شكرا لكى دمياطيه

نائبة المدير

احنا بنسب ونلعن فى التخريب والحرق والدمار

البلد بتضيع يا دمياطيه واحنا السبب فى كده

فيه ناس بتولع شراره واحنا بنجرى وراهم

من ساعه احداث ماسبيرو وبقينا نقول بلاش مظاهرات متحصلش تجمعات عشان الناس اللى عايزة تخرب مصر بتندس وسطهم وبتولع الدنيا

تقدرى تقوليلى الناس اللى فى ميدان التحرير ايه اللى بيخليهم يروحوا شارع محمد محمود اللى فيه مقر الداخليه ؟؟؟ ما احنا اللى بنجر شكلهم برمى الطوب عليهم

عايزين نتظاهر نفضل فى الميدان ونتظاهر برحتنا

وعلى فكره فيه ناس مندسه وسط الميدان ومتقوليش لا اسمعى البرامج وهتشوفى الكلام اللى بيتقال

السبب فى كده الاخوان والسلفيين هما اللى دعوا لجمعة المطلب الواحد وخاصه حازم صلاح اللى بقى عمال يولع ويقول المجلس ولازم يمشى وسلطة مدنية وغيره بقى انت تنفع رئيس وانت بتدمر البلد

انتى عارفه لما بنعمل مظاهرة البورصة بتخسر قد ايه
شوفتى السياح اللى عمالين يمشوا من مصر عشان عدم الامن
شوفتى المصالح اللى بتقف بسبب التجمعات والمرور

ده كله ليه

قالوا الانتخابات اولا وادينا مستنيين الانتخابات فى 11 والشورى فى 1 وبعد كده هيتم الدستور ثم الانتخابات الرئاسية

الكل عارف كده ليه بقى الاشاعات والمجلس هيستأثر بالحكم والمشير هيرشح نفسه وهكذا وهكذا

احنا اللى مسيرين بنمشى ورا اى كلام

محدش بيفكر فى مصر كله عايز طلبه ورأيه اللى يمشى

جيشنا اللى كل العالم بيحترمه بيتهزق وهيبته راحت

ولنفرض ان سلمنا السلطة للمدنيين تفتكرى انهم هيثبتوا ع حد او رأى ولو ثبتنا تفتكرى المركب اللى فيه كام ريس بتمشى

مش عايزين شرف اهو مشى ورونا هتجيبوا مين والتخين مش هيعرف يمشى البلد بردو لاننا فى ازمة

البلد هتفلس واحنا مش دريانين البورصة خسرت 28 مليار جنيه النهارده

ولسه، اللى حصل ده عشان تحصل حرب اهليه واهو المشير قال كله هيخلص قبل يونيو 2012 هيتهدوا ويمشوا من الميدان ابدا

انا عارفه ان عندنا ازمات كتيره انتى ذكرتيها بس مفيش تنظيم شايفه البلد عامله ازاى كل شىء مش متوفر وديون وغيره

حسبى الله ونعم الوكيل فى اللى عايز يضر مصر وربنا يرجع عقولنا فى راسنا

وكفايه كده بقى وبلاش شكل مع الشرطة المؤذيه كفايه اللى استشهدوا ولازم المسئول يتحاسب

شكرا دمياطية ع موضوعك الواحد مهموم وحزين ع البلد

مديره المنتدى

أنا مش بدعى على المتظاهرين ولا حاجة أنا صعبان عليا اللى بيحصل فى البلد بجد حرااااااااااااااااااام وشباب مصر اللى بيضيع والبلد اللى بتولع

يارب يعدى مصر من الأزمة دى على خير

بجد مصر محتاجة مننا كلنا الدعاء فى كل صلاة

» على تويتر: الداخلية كانت بتبخر المتظاهرين والشاذلي الوحيد اللي بيتحاسب بالعدل
» ترحيل أمريكى يحرض المتظاهرين فى التحرير
» الداخلية تلقى القبض على 43 من المتظاهرين بميدان التحرير
» "حجازى" يطالب المتظاهرين بالبقاء فى التحرير حتى تتحقق كل المطالب
» عاجل اشتباكات بين المتظاهرين وقوات الأمن فى ميدان التحرير