اولا انا باحب استخدام التوابل يكون للنكهة اه
لكن كمان يكون له فوايد تانية
مثال الزعتر مهم جدا لعضلة القلب
خصوصا لما يكون الجسم معرض لحالة برد او زكام
فتلاقي الزعتر ده عندي زي المية بيتحط في كل اكل
مثلا الزنجبيل ده منشط للدورة الدموية والناس الكسلانة باستمرار
ومهم جدا ايام الشتا
وهكذا هكتب التوابل وفوايدها كمان
تاني حاجة في التوابل لازم تخزين الكميات الكبيرة منها في الفريزر...يعني ربع كيلو وطالع
تالت حاجة تحتفظي بيها في برطمان زجاج والغطا يكون تحته طبقة عازلة زي منديل ورق او قطعة بلاستيك
وده لضمان عدم تسرب ريحة التابل بتاعك
رابع حاجة تطحني كمية قليلة جدا في البرطمان يعني يا دوب يكفي اسبوع مثلا
علشان التوابل معظمها زيوت طيارة وتركها فترة طويلة مطحونة بيفقدها مفعولها وكمان ريحتها وطعمها
مهم جدا تبعديها عن الشاي والسكر علشان ما يلقطش منها
نيجي بقى لكل نوع اكل بنستخدم ايه
اللحوم لها عدة توابل مخصصة لها
السماق الزعتر او الاوريجانو الزنجبيل الفلفل الاسود روزماري او حصا اللبان القرنفل الحبهان البابريكا وكمان الكركم احيانا
اذا كنت هتستخدمي اللحمة مفرومة مهم قوي تحط لها سماق بيخلي ريحتها جميلة ولونها كمان
والسماق ده مهضم بالنسبة للاكلات الدسمة
وعلشان كده تلاقي الكبيبة الشامي بيضاف لها سماق
وطبعا اللحمة المفرومة بتاخد منك تقريبا كل التوابل ده
في حالة السلق العادي مش بنستعمل السماق او الروز ماري لأنه بيغير لون الشربة ويخليها غامقة
كمان مش بنستخدم البابريكا ولا الكركم لنفس السبب
ويا ريت تتحط في السلق من غير طحن وبعد ما تشيلي الظفرة اللي بتكون على وش اللحمة
في حالة اللحم مشوي او كباب حلة او تحمير او فرن
براحتك ان شالله تحطي كل التوابل ده على الاكلة
بس خلي كمياتك من كل نوع لا تزيد عن ربع معلقة
وبالنسبة للقرنفل بالذات يا دوب مسمار في السلق او رشة بطرف المعلقة
وحاولي تكون في نهاية الطبخة تقريبا
التوابل ده بتدي نكهة رهيبة للحمة وتخلي ريحتها جنان
كمان بتدي لون جميل للحمة مهما كان نوعها
خصوصا البابريكا اللي لونها احمر والكركم بلونه الاصفر
نشوف بقى فايدة كل نوع من ناحية المعلومات وكمان خبرتي في استخدامها
السماق ..ده مهم قوي لهضم الدهون يعني اذا عرفت تضيفيه على الملح بتاع السفرة هيكون ممتاز
طعمه لازع ومقبول جدا مع البيض والجبنة واي معجنات بتدخل فيها الحليب
الزعتر او الاوريجانو ده منشط لعضلة القلب ومهضم
علشان القلب انا باستخدمه حتى مع الشاي زي النعناع ممكن كمان على الجبنة وبرضه المعجنات
الزنجبيل ده حبيبي لدرجة بحط رشة على عصير البرتقال
نكهته في الاكل معروفة ورهيبة بيحرك الدم بسرعة علشان كدا في الشتا بيدفي جدا ويعرق
وطول ما فيه في البيت حالة زكام الزنجبيل بيلف علينا
الفلفل الاسود غني عن الكلام برضه منشط للدورة الدموية بس قللي منه علشان ما يأثرش على المعدة التعبانة
ممكن ايام البرد تضيفيه على الجبنة والبيض
كمان الحوامل اللي دايما دايخين وضغطهم منخفض شريحة عيش بالجبنة مع الفلفل الاسود وكوب عصير طماطم محلى بيخليها اكسبريس
روزماري او حصا اللبان ممتاز قوي للكبد يا بنات وبيخفض السكر لو الاكلة تقيلة
القرنفل رهيب في الهضم وجربي كدا تكوني متخومة وحاسة ان معدتك هتطق من الاكل وخدي مسمارين على لسانك مص وشوفي النتيجة بعد دقايق
الحبهان منشط ومزيب لدهون البطن والكبد وبرضه للي بيعاني من دهون الكبد عليها بمص الفصوص يوميا
البابريكا وكمان الكركم الاتنين لونهم مهم للاكلة
ومضاد اكسدة وبحط منهم على العصير طول الشتا علشان البرد
والبابريكا كمان مهمة قوي عندي لسبب
لما تكون الطماطم لونها فاتح مش بحب اضيف صلصة للبصل بتاع التسبيكة
احط معلقة صغير بابريكا على البصل بعد ما اشوحه وقبل عصير الطماطم مباشرة
بيخلي التسبيكة جنان وممكن اضيف برضه على التسبيكة رشة كركم بيديها لمعة حلوة
فيه حاجة برضه بستخدمها للحوم خصوصا في السلق
الريحان رهييييييييييييييييييب لما تحطي قبل ما تطفي النار بعد السوا ورقتين تلاتة منه
وكمان مع فرم اللحمة وتوابل الشوي
ويا سلام عليه مع تسبيكة الطماطم
والريحان مهضم ومهديء وبيخفف على المعدة الضعيفة تقل الوجبة او اذا كانت توابلك كتيرة
