اكسري للبنت...ضلع تصحي الصبح متلاقيهاش

التربية مش انك تمنعيني اعمل الغلط , التربية انك تكرهيني في الغلط من الاساس,

مش المفروض تضربيني لما اكلم شاب,المفروض تخليني انا من نفسي رافضة اكلمه !

ليه بتستني لما تحصل الكارثة بعدين تصلحيها,ما توفري علي نفسك و عليا و تاخديها من اولها,


بنتك انتي ادري بيها و بمفاتيحها,انتي اللي عارفة بتحب ايه و بتكره ايه,
ازاي بعد كل دا مش عارفة تصاحبيها ؟


ولا انتي متخيلة انها لما تيجي تحكيلك علي اللي بيحصل من صاحباتها في المدرسة و تفضلي توعظيها و تحمريلها في عنيكي هي كدا خلاص بقت صاحبتك ؟


فيها ايه لو سمعتي منها و فهميتها اد ايه انتي فرحانة بيها عشان هي مش زي البنات دول و فهمتيها هما غلط في اية,ساعتها هي من نفسها هتكره انها تبقي زيهم,


خليها تحبك و تحترمك عشان تخاف علي زعلك بدل ما تخاف من غضبك,

رفقاً بالقوارير, دي بنتك يعني انتي اللي بتشكليها بايديكي,
ليه تولدي فيها عند و نشوفية دماغ ؟


ليه متخليهاش صاحبتك,
انتي فاكرة انها هتنسي ضربك ليها ولا شتيمتك ؟
هتفضل طول عمرها فاكرالك انك في الموقف الفلاني بدل ما تنصحيها باللين خدتيها بالعنف, و ساعتها مترجعيش تقولي ايه اللي قسي قلب بنتي عليا.


انا كتبت الكلام دا و ربنا يعلم اني مش قاصدة حد يزعل مني ولا قاصدة اتفذلك او اكون قليلة الذوق,
بس انا في سن بناتكوا و بشوف كل انواع الامهات و بشوف تاثيرهم علي ولادهم عامل ازاي,

بشوف البنات اللي بتتمني تطلع نسخة من مامتها
و بشوف البنات اللي كل املها انها ميبقاش ليها علاقة بمامتها

منقول للاستفادة,