السلام عليكم ورحمة الله وبركاته
بعد التحيه يا اصحابي احب انقل لكم تجربتي مع اولادي وانصحكم نصيحه لوجه الله ...
انا ام لبنت وولد , البنت 6 سنوات والولد 4 سنين , وكنت في اول عمرهم عصيبه جداااااااااا وصارمه جدااااااااااا واشخط وازعق واعاقب واذنب وكنت افتكر ان كده صح وان انا كده ناصحه بقى وان هو ده الادب اللي بصحيح ....
لكن اكتشفت ان كل اللي بعمله ده غلط في غلط , واني بضيع اجمل سنوات عمري مع اولادي في الشخط والزعيق لغايه الولاد ما اتخنقو مني ...
هو انا ليه مش بتكلم معاهم ؟؟؟
ليه مش بنلعب سوا ؟؟؟
ليه مش بحضنهم واستمتع بامومتي ؟؟
مستنيه ايه ؟؟؟ يروحو يدورو على حضن احن من حضني يترمو فيه ؟؟؟
غلطاااااااااااااااااااااااااااااااااااانه
انا دلوقتي غيرت سياستي معاهم تماما ... بقيت صبوره جداااااااااا واتكلم معاهم واحضنهم ونتكلم بالراحه ... تصدقو ان انا اللي كنت السبب في عصبيتهم !!!!
حيجيبو الهدوء منين اذا كانت امهم بتصرخ في وشهم ؟؟
انا كنت لما الاقيهم بيتعصبو ويصوتو على لعبه او بيضربو بعض كنت اقوم آكلهم واعاقبهم واضربهم لكن دلوقتي لما الاقيهم بياكلو في نفسهم ومتعصبين وبيعيطو باخدهم في حضني واطبطب عليهم ونتكلم بهدوووووووووء , تصدقو انهم بيهدو على طول وبيسمعو الكلام ومش بيجادلو زي الاول ومش بيعندو خلاص !!!!!! انا كنت السبب في كل ده من غير ما اعرف , ربنا يسامحني
انا بقيت صاحبتهم وحنينه عليهم جدااااااااااا واخدهم في حضني كتير وابوسهم ولما يعملو حاجه غلط اوجههم بهدوء وبحب واقولهم مش حنعمل كده تاني يا حبيب مامي ؟؟ يقولولي خلاص يا مامي
وهم بقو مندهشين وفرحانين بماما الحلوة اللي معادتش بزعق وتصرخ في وشهم
الطفل عنده كرامة لازم احافظله عليها ولازم ما اكسرهوش واحترم شخصيته وانميها
تصدقو ان ولادي بقو هاديين وبيسمعو الكلام وبيذاكرو دلوقتي من غير ما اقول !!! سبحان مغير الاحوال وعلى فكرة يا اصحابي انا دعيت كتيييييييير اوي عشان ابقى هاديه وصبوره مع اولادي وانزل لمستوى عقلهم وتفكيرهم , لقيتهم بجد ملائكه وعندهم براءه انا مكنتش واخده بالي منها , بس الحمد لله ان انا تداركت الموقف واقدر اني اعوض السنين اللي فاتت واشبعهم حب وحنيه وتفاهم وكلام واستماع وكل حاجه حرمتهم منها انشاء الله ...
وبنصح كل ام بالله عليكي خدي ابنك في حضنك وشبعيه حب وحنان ولما يعمل حاجه غلط خديه في حضنك وبوسيه وبعدين وجهيه حيسمع كلامك في ثانيه واحده وابتعدي عن التوبيخ والشتيمة والزعيق والاهانه , ولادنا لازم نحترمهم ونحتضنهم قبل ما يضيعو مننا علشان ييجو يحكولنا على كل حاجه وميروحوش لحد تاني يحكوله .. اسفه على الاطاله بس انا قلت لازم افيدكم وانقل لكم حكايتي وتجربتي
ادعولي ربنا يغفرلي ويسامحني ..... ارجو تثبيت الموضوع للافاده لكل الامهات الجدد ولا تنسو التقييم
والسلام عليكم ورحمة الله وبركاته
